Cerdd Abertawe

Mae Cerdd Abertawe yn cefnogi ysgolion, addysgwyr a chymunedau drwy hyfforddiant o safon uchel a phrosiectau cydweithredol. Daeth digwyddiad datblygiad proffesiynol parhaus diweddar ag athrawon peripatetig at ei gilydd i edrych ar y cynllun Profiadau Cyntaf, ymarfer cynhwysol, a cherddoriaeth blynyddoedd cynnar mewn partneriaeth â sefydliadau cenedlaethol.

Mae prosiectau BuzzAlong a BandAlong yn cyflwyno pBuzz dosbarth cyfan ym mlwyddyn 3, gan symud ymlaen i fandiau pres llawn erbyn blwyddyn 5. Mae bron i 1,000 o ddisgyblion ar draws naw ysgol yn cymryd rhan, gyda’r PlayAlong Bonanza blynyddol sy’n dathlu cynnydd mewn perfformiad byw gyda cherddorfa cyn-fyfyrwyr a band mawr.

Mae cynhwysiant yn flaenoriaeth a hynny wedi’i gefnogi gan becynnau cerddoriaeth anghenion dysgu ychwanegol, y rhaglen Gerddorfa Agored mewn dwy ysgol arbennig, a sesiynau cerddoriaeth fynegiannol yn Uned Cyfeirio Disgyblion Maes Derw. Mae’r disgyblion hefyd yn mwynhau gweithdai cerdd byd-eang mewn Taiko, Tabla, a Samba, ac mae dysgwyr jazz uwch yn cymryd rhan mewn profiadau byw drwy Ŵyl Jazz Ryngwladol Abertawe.

Mae llwybrau perfformio yn parhau i dyfu, gyda sesiynau canolfan gerddoriaeth am ddim, cwrs preswyl y Chwe Sir, a chyngherddau yn Neuadd Brangwyn. Mae partneriaethau newydd gyda BBC NOW, Celfyddydau Cenedlaethol Ieuenctid Cymru ac eraill yn creu hyd yn oed mwy o gyfleoedd ar gyfer cerddoriaeth gerddorfaol ac ensemble.